ni Alfonso T. Ruda
DIPOLOG CITY, DEC. 21(PIA)--- Gi-aprobahan na sa Government Service Insurance System ang paglugway ug 20 mil pesos nga emergency loan sa mga kwalipikadong membro s GSIS nga nagpuyo o kaha nagtrabaho sa mga lugar nga grabeng naapektuhan sa bagyong si Sendong.
Ang loan, nga mahimong aplayan sugod karong adlawa, Disyembre 21, 2011 hangtud sa Enero 20, 2012, bukas alang sa mga kwalipikadong membro nga nagpuyo o kaha nagtrabaho sa mga lalawigan sa Misamis Occidental Oriental ug Negros Oriental, Polanco ug Dipolog City sa Zamboanga del Norte ug Clarin ug Ozamis City Misamis Occidental.
Lakip usab sa makapahimulos sa pautang ang mga apektadong membro sa Asuncion, Davao Del Norte; Tagbina, Surigao Del Sur; Hinatuan, Surigao Del Sur; Bislig, Surigao Del Sur; Lingig, Surigao Del Sur; Talacogon, Agusan Del Sur; Valencia, Bukidnon; Nabunturan, Compostela Valley; Montevista, Compostela Valley; Compostela, Compostela Valley; New Bataan, Compostela Valley; Monkayo, Compostela Valley; Iligan, Lanao Del Norte; Bubong, Lanal Del Sur; and Kapai, Lanao Del Sur.
Ang makapahimulos sa maong loan mao ang mga membro nga mga empleyado sa ahensiya nga nahimutang sa mga lugar nga unang gideklarar ni Presidente Benigno Aquino III sa State of Calamity; aktibo sa serbisyo; dili kasamtangang nagpahimulos sa leave of absence without pay; walay pending nga kasong kriminal o administratibo; walay amorosong kontribusyon; ug walay loan nga nagdeklarar nga “in default”.
Dili usab makapahimulos sa loan ang mga empleyado sa mga ahensiya nga nasuspende sa GSIS gumikan sa dili pagbayad ug pagremit sa ilang premiums.
Ang mga membrong gustong mopahimulos sa loan mahimong mag-apply pinaagi sa GWAPS Kiosk gamit ang eCard o UMID eCard.
“Ang mga membro nga walay eCard o UMID eCard apan kwalipikadong makapahimulos sa loan pinaagi sa Over-the-Counter.”
“Ang proceeds sa loan pinaagi sa Over-the-Counter mahimong adto i-credit sa temporary eCard nga gisugdan ug isyo sa GSIS,” matod pa sa GSIS.
Ang loan nagdala ug interest nga 6 porsiento matag tuig, computed in advance ug pagabayran matag bulan sulod sa tulo ka tuig.
Ang nasangpit nga loan dunay Loan Redemption Insurance nga 1.2 porsiento sa goss loan amount ug pagakuhaon gikan sa kita sa loan.
Midugang pa ang GSIS, nga ang mga member-borrowers nga dunay outstanding emergency loans mahimong maka-renew sa loan basta nakabayad na kini ug dili momenus 12 ka monthly installments apan dili mas sayo kay sa anniversary date sa naunang loan. (ATR/PIA9-Zambo Norte)
