ni Franklin P. Gumapon
DIPOLOG CITY, Dec. 22 (PIA) - - Taga-an ug mga ‘Noche Buena pack’ ang mga pamilyang nabiktima sa bagyong Sendong sa rehiyon 7 ug 10 sa dili pa muabot ang pasko.
Mao kini ang gipahibalo ni Secretary Corazon “dinky” Juliano-Soliman karong bag-o.
Sumala pa ni Soliman, adunay subra sa P28.47 milyones ka pesos ang gigahin alang sa maong katuyu-an.
Dugang pa ni Soliman nga mikabat na sa P12.62 milyones ang balor sa hinabang nga nahatag ngadto sa may 54,226 ka pamilya nga may 299,498 ka tawo nga naigo sa bagyo. Sa maong kantidad, kapin sa P10.87 milyones ang nagikan sa panudlanan sa DSWD, and P1.22 milyones gikan sa local government units (LGUs) u gang P524,000 gikan sa non-government organizations (NGOs).
Sa pagka-karon, adunay pay 58 ka evacuation centers nga gihimong temporaryong puy-anan sa may 9,940 ka pamilya nga may 43,718 ka tawo samtang adunay 39,434 ka mga pamilyang biktima sa baha nga adunay 218,564 ka tawo ang mipuyo sa ilang mga amigo ug mga paryente nga nagpuyo sa mga dapit nga layu ra sa baha.
Gimando-an usab ni Secretary Soliman ang buhatan sa DSWD-10 nga maoy modumala sa evacuation centers sa maong rehiyon aron hapsay ang pagpang-apu-apod sa mga relief good sa maong rehiyon.
Sa susamang kalambo-an, ang DSWD migahin ug P28.07 milyones alang sa cash-for-work (CFW) program alang sa mga apektadong pamilya sa Misamis Oriental ug Lanao del Norte.
Ang dakbayan sa Cagayan de Oro gigahinan kini ug P14.48 milyones samtang ang dakbayan sa Iligan adunay gahin nga 1.87 milyones. (FPG/PIA-Zambo. Norte)