ni Franklin P. Gumapon
DIPOLOG CITY, Dec. 20 (PIA) - - Natabangan sa Department of Social Welfare and Development (DSWD) ang may 31,380 ka pamilya sa amihanang Mindanao nga grabeng naigo sa pagbaha gumikan sa bagyong Sendong kaniadtong Deciembre 17.
Gipahibalo ni DSWD Secretary Corazon “Dinky” Soliman nga ang mga apektadong pamilya nahatagan na sa mga relief good sama sa saput, gamit sa kusina, noodles ug bugas. Migahin usab ang maong buhatan sa kantidad nga P992,530.16 para sa mga relief good nga iapod-apod sa mga biktima.
Dugang pa ni Soliman nga ang iyang buhatan nakadawat ug balor sa P30,088 nga relief good gikan sa mga non-government organizations ug mga mabuot nga lungsuranon.
Sa Cagayan de Oro, adunay 19 ka mga evacuation center ang gipahimutang alang sa 6,737 ka mga apektadong pamilya o mokabat sa 28,767 ka mga tawo gikan sa 29 ka mga barangay.
Sa dakbayan sa Iligan, adunay 13 ka evauation center ang napahimutang alang sa 5,521 ka pamilya o may 33,126 ka mga tawo.
Didto sa Manticao, Misamis Oriental, aduna usay 13 ka evacuation center para sa 970 ka apektadong pamilya nga may 5,820 ka tawo.
Padayun usab karon sa pagpanawat ang DSWD ug mga volunteer nga motabang pag-atiman sa mga biktima sa baha. (FPG/PIA-Zamboanga del Norte)