ni Franklin P. Gumapon
DIPOLOG CITY, Dec. 21 (PIA) - - Gipahayag karon ni Secretary Corazon “Dinky” Juliano-Soliman nga mikabat na ngadto sa P7.83 milyones ang nahatag nga hinabang ngadto sa mga nabiktima sa baha didto sa dakbayan sa Cagayan de Oro ug Iligan kaniadtong Deceimbre 17.
Ang maong mga hinabang nagagikan sa mga local government units (LGUs) ug ubang grupo nga mitunol sa ilang tabang alang sa mga biktima.
Matud pa ni Soliman, sa maong kantidad, subra P6.68 milyones ang nagagikan sa iyang buhatan ug P632,333,75 gikan sa LGUs, ug P524,000 gikan sa non-government organizations (NGOs).
Sumala sa natala kagahapong adlawa, mikabat sa 58,316 ka pamilya nga may 317,973 ka mga sakop ang nawad-an sa ilang kapuy-an human gisilhig sa makalilisang nga baha tungod sa bagyong Sendong. Ang maong mga pamilya nagikan sa 210 ka mga barangay sa pito ka dakbayan ug 22 ka mga lungsod sa walo ka lalawigan ug lima ka rehiyon nga mao ang 7,9,10, 11 ug CARAGA.
Sa pagkakaron, adunay 62 ka evacuation center nga temporaryong gipuy-an sa may 9,743 ka pamilya nga adunay 42,733 ka membro. Laing 41,340 ka pamilya nga may 241,877 ka mga sakop ang gi-atiman usab karon gawas sa mga evacuation center.
Sa rehiyon 9, adunay 1,290 ka pamilya nga adunay 4,471 ka mga sakop nga naigo sa bagyong Sendong nga nagikan sa 15 ka mga barangay sa lalawigan sa Zamboanga del Norte.
Ang DSWD mihatag ug balor P255,350 nga ayuda alang sa mga bitima sa baha didto sa dakbayan sa Dipolog.
Sumala sa DSWD, ang rehiyon 10 maoy grabeng naigo sa baha nga dala sa bagyong Sendong nga mibanlas sa mga pinuy-anan sa may 43,305 ka pamilya nga adunay sakop nga mokabat 254,636 ka tawo gikan sa 119 ka mga barangay sa tulo ka dakbayan ug tulo ka lungsod sa mga lalawigan sa Misamis Oriental, Lanao del Norte ug Bukidnon.
Sa rehiyon 11, adunay 396 ka pamilya ang apektado nga may 1,980 ka tawo gikan sa 10 ka barangay sa tulo ka lungsod sa lalawigan sa Compostela Valley. Nataga-an na sa hinabang ang maong mga lugar sa DSWD nga mikantidad sa P204,000.
Ang CARAGA, adunay 1,304 ka pamilya nga may 6,781 ka tawo ang naigo gikan sa 12 ka barangay sa upat ka lungsod ug usa ka dakbyan sa mga lalawigan sa Surigao del Sur ug Agusan del Sur tungod sa baha ug inas sa yuta. Ang kagamhanang probinsyal sa Surigao del Sur nakahatag na ug mga hinabang balor P229,000. (FPG/PIA-Zamboanga del Norte)