ni Alfonso T. Ruda
DIPOLOG CITY, NOV. 18(PIA)-- Ang Philippine Red Cross-Zamboanga del Norte Chapter nagsugod na karon sa ilang pagpangandam alang sa nagkalain-laing fund-raising activities nga ilang pasiugdahan sunod tuig.
Sumala pa sa lokal nga buhatan sa Red Cross, lakip sa mga gihan-ay nga kalihokan pagalangkuban sa Musical Competition’12- usa ka kompetisyon sa natad sa musika nga ipahigayon sa Dipolog City Sports Complex didto sa Barangay Olingan ning dakbayan karong umaabot nga Pebrero 14, 2012.
Ang maong kalihokan gipaluyohan sa DepEd Dipolog City Schools Division ug Rotaract.
Gawas niini, duna pay pagahimoong Search for Miss Red Cross 2012 ug Sky Lanterns Festival 2011 karong umaabot sa Disyembre 17, 2011 sa Dipolog City Boulevard mga alas 6:30 ang takna sa gabii.
Ang Sky Lanterns Festival mao ang ikaduhang susamang kalihokan nga gipasiugdahan sa Red Cross nga nagmalampuson pinaagi sa suporta sa katawhan, nga nagsilbi usab nga Christmas-Fund-Raising Campaign sa nasangpit nga buhatan.(JPA/ATR/PIA9-Zambo Norte)