ni Alfonso T. Ruda
DIPOLOG CITY, Nov. 12 (PIA)--- Usa ka libreng pagpangapon sa iro ang nakatakdang pagahimoon diha sa covered-court sa Brangay Sta. Isabel karong Noyembre 16.
Ang libreng pagpangapon sa iro maoy paghatag ug bulok sa 3-ka adlawng Regional Scientific Convention sa Philippine Veterinary Medical Association -Western Mindanao Chapter nga ipahigayon dinhi sa dakbayan sa Dipolog gikan Nobyembre 16 ngadto sa 18 sulod sa Zamboanga del Norte Convention and Exhibition Center.
Ang maong nkalihokan nahasubay usab sa vision sa gobyerno nga himoong rabies-free ang Pilipinas pag-abot sa tuig 2020.
Matod pa ni Dr. Ken Yee, Officer-in-Charge sa DA-9 Regional Satellite Office nga nakabase sa Upper Turno, Dipolog City, ang pagpangapon sa mga iro magsugod alas 9 ang takna sa buntag hangtud alas 4 ang takna sa hapon.
Ang mga irong pagakapnon mao kadtong mga bayeng iro nga nagpangidaron ug gikan 6 ngadto sa 7 ka bulan ug wala pa sukad moagi ug pangulag. Bisan ug prayoridad sa ilang pagkapon ang mga babayeng iro, mokapon gihapon sila ug mga nga laking iro.
Matod pa ni Yee, ang pagpangapon nga gitawag ug spay and neuter himoon sa mga ekspertong veterinarians nga gikan sa dakbayan sa Sugbo, tungod kay gawas nga duna na silay tukmang kasinatian sa maong gimbuhaton, sila lang usab ang dunay kompletong kahimanan alang niini.
Alayon niini, nanawagan si Dr. Yee sa mga nagbuhi ug iro nga pahimuslan kining maong kahigayonan pinaagi pagpagpalista sa labing daling panahon sanglit 100 ka gatos lang ka iro ang ilang dawaton sa maong kalihokan. “Ang pagpakapon ug iro sa usa ka pribadong veterinarian mokostar sa tag-iya ug labing ubos, 2,500 pesos,” matod pa ni Yee. (JPA/ATR/PIA9-Zambo Norte)