ni Alfonso T. Ruda
DIPOLOG CITY, NOV. 10 (PIA) -- Si Presidente Benigno Aquino III subling misaad sa katawhan nga padayong maningkamot ang gobyerno nga mapatuman ang mga reporma ug mapadayon ang mga programang maghatag ug benepisyo sa katawhang Filipinhon.
Dungan niini, nanawagan ang Presidente sa mga Filipino nga suportahan ang mga programang gipatuman sa gobyerno sanglit kini lang usab ang maghatag sa nasod sa malungtarong kalinaw ug kalambuan.
Sa iyang pagpakigpulong atol sa ika-54 nga Philippine Army Change of Command sa Army Headquarters sa Taguig City kahapon, si Presidente Aquino nagkanayon nga pinaagi sa pagtinabangay padulong sa usa ka katuyoan nga mao ang pagkab-ot sa malungtarong kalinaw, kini usab ang magdala sa nasod ug malungtarong kauswagan ug kalambuan.
Subli usab nga gipahayag sa Presidente nga ang paglusad ug gubat dili mao ang tukmang solusyon sa apagkab-ot sa kalinaw sa nasod ug kasiguroan sa katawhang Filipinhon.
“Akong gibarugan nga isalikway ang pagdiktar ug gubat tungod kay nagtoo ako nga duna pa kitay mas lalom nga tulubagon. Ug ang pinakatumong sa atong katungdanan dili ang pagpakiggubat kundili ang pagluwas sa katawhang Filipinhon,” matod pa sa presidente.
Midugang pa si Presidente Aquino nga ang pinakadiwa sa matag sundalong Filipino, dili gisukod pinaagi sa kadaghan sa kinabuhing iyang nakutlo kundili kon pila ka kinabuhi ang iyang naluwas gikan sa panag-engkuwentro.
“Mao karoy akong gihunahuna ang atong mga kaigsoonan sa Mindanao ug ang mahimong kaugmaon sa mosunod pang henerasyon,” matod pa ni Presidente
Aquino. (JPA/ATR/PIA9-Zambo Norte)