by Alma L. Tingcang
CLARK FREEPORT ZONE, November 10 (PIA) –- Gipasalig ni Presidente Benigno Aquino III nga ang iyang administrasyon dili mopugong sa media freedom sa nasod ug miingon nga ang prensa magpabilin nga magbalantay sa demokrasya sa Pilipinas.
“Sa matulid nga dalan, walay morenda o mohigot sa mga media diha sa ilang liog aron mahimong mosunodsunod lamang. Walay mogamit sa radyo o mantalaan aron magpataka ug estorya nga way pulos o modaot ni bisan kinsa,” ang presidente miingon sa iyang mensahe atol sa toplevel conference sa Kapisanan ng mga Brodkaster ng Pilipinas (KBP) didto sa Clark Freeport Zone, Pampanga kagahapong adlawa.
“Magpabilin nga magbalantay sa demokrasya ang media sa nasod ug katambayayong ninyo ang administrasyon aron magpabilin ang pinakataas nga level sa propesyonalismo, integridad ug kredibilidad sa inyong trabaho,” dugang pahayag sa presidente.
Gidayeg sa presidente ang mapadayonong kalihokan sa KBP aron maseguro ang paghatag ug impormasyon ngadto sa publiko sukad pa niadtong panahon sa Martial Law sa nasod. Sa dihang natabonan sa politika ang panglantaw sa publiko, dako ug papel ang KBP sa paghisgot sa mahinungdanong isyu nga nakapataas usab sa panglantaw sa katawhan.
Sa samang paagi, giila usab sa presidente ang dedikasyon sa KBP isip gitawag nga “fourth state” sa katilingban labi na gayod sa pagsulod sa bag ong matang sa media ang Internet.
Apan nasayod usab siya nga dili perpekto ang media ug nga gikinahanglan usab nga bantayan nila ang ilang mga kauban nga corrupt, mapatuyangon ug walay prinsipyo nga indibidwal nga nakadaot sa maayong reputasyon o dungog sa mga media practitioners.
Kinahanglan tugbangan sa media ang expectation sa katawhan, ang presidente miingon, ug dapat lamang sila magpabilin nga taas ang integridad susama sa expectation sa publiko sa ilang mga natudlong opisyal.
“Tungod niini, ang matag usa kanato adunay tulubagon sa katawhan,” matod pa sa presidente. (ALTPIA9/Zambo Sur)