ni Alfonso T. Ruda
DIPOLOG CITY, OCT. 19(PIA) -- Gipalapdan na karon sa Buhatan sa Maayong Panglawas sa kagamhanang-lokal sa dakbayan sa Dipolog ang pagsabwag ug impormasyon kabahin sa Sexually-transmitted Infection(STI).
Matod pa ni Liberty Sulit-Sybico, Health Planning Officer sa CHO-Dipolog, ang aksyon gihimo human nga natala sa nasangpit nga buhatan ang 93 ka mga kaso sa Sexually-Transmitted Infections sa ikatulong quarter niining tuiga.
Base sa report sa City Health Office, sa 1,195 ka Guest Relation Officers nga na-eksamin sa CHO, 93 ang migula nga positibo sa STI---30 ang natala Hulyo, 30 sa Agosto ug 33 sa bulan sa Septyembre.
Matod pa ni Sybico, gipalapdan karon sa CHO ang pagsabwag ug impormasyon kabahin sa STI dili lamang ngadto sa mga GRO kundili hangtud na sa nagkalain-laing sektor sa kumunidad, ilabi na sa mga tunghaan tungod sa kadaling manakod niini.
Nasayran nga duna nay gihan-ay nga eskedyul sa himoong pagsabwag ug impormasyon sa tanang pribado ug pangpublikong tunghaan sa sekondarya ug kolehiyo dinhi sa dakbayan.
Aron malikayan nga matakbuyan niining maong sakit, gitambagan ni Sybico ang tanan nga magmatinud-anbon sa ilang mga mahal sa kinabuhi ug mahimong
responsable sa pagpakighilawas tungod kay ang dali lang matakbuyan ug STI mao ra usab kadtong mga tawo nga daghan ug katagay sa kalipay.
Pipila sa gitumbok ni Sybico nga timailhan sa tawong natakdan ug STI mao ang hilanat, pagkausab sa kolor sa ihi, pagpangatol sa pribadong parti sa lawas, ug kawalay-ganang mokaon.
Apan giklaro ni Sybico, nga ang STI mahimo pang matambalan, dili pareho sa HIV/AIDS nga bisan ug duna kiniy tambal, magpabilin lang gihapon ang kagaw niini sa lawas sa tawo.
Hinuon, matod pa ni Sybico, wala pa silay amonitor nga apektado sa HIV/AIDS dinhi sa dakbayan sa Dipolog.(ALT/ATR/PIA9-Zambo Norte)
