DIPOLOG CITY, Oct. 7(PIA) -- Ang Government Service Insurance System (GSIS) padayon karong nagpatuman ug mga kausaban aron mapalambo ang ilang serbisyo ug masakop ug makabenepisyo ang kapin sa 1.4 milyones nilang mga membro.
Kini gihimo sa GSIS pinaagi sa pagpalapad sa ilang partnership uban sa Land Bank of the Philippines.
Ilalom sa maong partnership, gihatagan ug kahigayonan sa GSIS ang ilang mga membro nga makuha ang abot sa ilang loan ug uban pang benepisyo pinaagi sa Unified Multi-Purposed Indentification eCard nga giisyo sa Land Bank of the Philippines.
Mahinumdoman nga niadtong Disyembre sa miaging tuig, gi-renew sa GSIS ang partnership uban sa LANDBANK aron mahatagan ug kahigayonan ang mga pensiyonado nga makuha ang ilang pensiyon ug uban pang benepisyo pinaagi sa LANDBANK ATM o pinaagi sa ilang eCard.
Ang LANDBANK dunay 327 ka mga sangang bangko kapin sa 900 ka mga Automated Teller Machines sa tibuok nasod.
Subling mahinumdoman, nga miani ug pagsaway gikan sa mga membro sa GSIS ang pagbalhin sa GSIS ngadto sa Union Bank isip bangko nga gamiton sa pagkuha sa bunga sa ilang loan ug uban pang benepsisyo, gumikan sa kagamay lang sa mga sangang-bangko niini, nga nagresulta sa pagpahamtang ug bank charges panahon sa pagwith-draw niini pinaagi sa ATM sa ubang mga bangko.
Gamit ang UMID eCard nga giisyo sa LANDBANK, mahimo nang makuha sa membro sa GSIS ang bunga sa ilang loan ug uban pang benepisyo sa bisan sang ATM sa Bancnet, Expressnet, ug Megalink sa tibuok nasod.
Ang UMID eCard nga giisyo sa LANDBANK mahimo usab nga gamiton debit card sa kapin sa 200 ka mga accredited merchanmts sa tibuok nasod ug isip discount card sa mga corporate partner sa GSIS sama sa Pfizer ug STI.
Ang nasangpit nga LANDBANK UMID ecard libre ug wala na magkinahanglan ug maintaining balance nga kinahanglanon ang mga membrong gustong mobalhin sa LANDBANK.
Matod pa ni GSIS Chairman ug General Manager Roberto Vergara, kining maong kausaban mao ang tipik lamang sa padayong pagpatuman ug mga inisyatibo nga nagtumong nga mapalambo ang serbisyo ug mapaduol ang GSIS sa ilang mga membro. (JPA/ATR/PIA9-Zambo Norte)
