Cebuano news: Gobyerno, naggahin ug P500 Milyon aron pagsumpo sa oil smuggling
by Alma L. TingcangMANILA , Sept 26 (PIA) –- Ang administrasyong Aquino naggahin ug P500 milyon alang sa Bureau of Customs (BOC) aron pagmugna ug high tech nga solusyon diha sa mapatuyangon nga smuggling sa mga petrolyo ug ubang high value imports.
Si LPG/MA party-list Rep. Arnel Ty miingon nga ang bag-ong pondo, nga nalakip sa proposed P1.816 trilyon nga General Appropriations Act of 2012 makatabang sa BOC aron pagtukod sa Petroleum Inventory System ug pag-angkon sa usa ka online X-ray machine imaging system.
Kung matapos kining Petroleum Inventory System Project, si Ty miingon nga makahimo na ang BOC ug makuting pagsubay sa mga oil imports diin ang bureau nagkuha sa 17 porsiyento sa ilang annual revenue collection.
Si Ty, kinsa miyembro usab sa House energy committee mipahayag niini isip tubag sa pagpasaka ug P1.05 bilyon nga oil smuggling case sa BOC batok sa Petronas Energy Philippines, Inc.
Ang maong kaso nagdala ngadto sa P44.33 bilyon ang kinatibuk-ang kantidad sa kaso nga gipasaka sa BOC batok sa pito (7) ka oil importers sa nakalabay nga 15 ka bulan.
Kasong smuggling gipasaka na niadto batok sa Pilipinas Shell Petroleum Corp. (P24.48 bilyon); Cross Country Oil & Petroleum Corp. (P8.5 bilyon); Phoenix Corporation Philippines Inc. (P5.1 bilyon); Jetti Petroleum Inc. (P4.1 bilyon); Oilink International Corp. (P700 milyon); ug Filpride Resources Inc. (P400 miyon).
Giawhag usab ni Ty ang BOC sa paggama ug kaugalingong laboratoryo ug gikinahanglan nga staff aron pagbuntog sa technical smuggling sa petrolyo, nga nakapasakit ug dako sa gobyerno pinaagi sa buhis.
“Ang nasangpit nga buhatan kinahanglan dili magsalig sa ubang ahensiya paghimo sa initial chemical analysis sa mga samples sa imported oil products,” si Ty miingon.
Kalabot sa online x-ray imaging system project, si Ty nagkanayon nga tugotan niini ang mga customs officers nga pinaagi sa high tech electronics, macapture, ma-apud-apod ug mapasa ang mga litrato sa shipments ug impormasyon gikan sa duha ka pilot sites - - ang Port of Manila ug ang Manila International Container Port.
Ang BOC nagkolekta ug buhis ug value-added taxes sa mga imports.
(ALT-PIA9/Zambo Sur)