DIPOLOG CITY, Sept. 20(PIA) -— Determinado ang administrasyong Aquino nga tubagon ang kakulangan sa mga lawak-tunghaan pinaagi sa pagpabarog ug 41.000 ka mga lawak-tunghaan sunod tuig.
Mao kini ang gipahayag ni Education Secretary Armin Luistro sa gipahigayong pagdungog sa senado sa gisugyot nga budget sa DepEd para sa 2012 nga 191 bilyones ka pesos.
Matod pa ni Luistro, 18.2 bilyones ka pesos sa ilang gipangayong pondo para sa tuig 2012 gamiton sa pagpabarog ug pagpaayo sa mga lawak tunghaan, diin 5 bilyones niini ang ipatuman pinaagi sa public-private partnership kon PPP Program.
Mahinumdoman, nga sa gipahigayong pagdungog sa budget sa DepEd niadtong miaging tuig, gitumbok sa DepEd ang lima ka nag-unang problema sa departamento sama sa kakulangan sa mga magtutudlo, libro, lingkuranan ug mga pasilidad sa tubig ug sanitasyon.
Matod pa ni Luistro, inanay nang gitubag sa DepEd ang maong mga problema. Dugang pa sa kalihim, sugdan na sa Deped ang paghatod ug dugang 12.5 milyones ka mga lingkuranan para sa tunghaan sa di pa matapos ang tuig 2011.
Gawas sa pagsulbad sa nag-unang lima ka problema sa DepEd, nga plano usab sa DepEd ang pagbutang ug internet connection ang 27,000 ka mga pampublikong tunghaan sa sekondarya sa tibuok nasod.
Sa pagkakaron, 68 porsiento sa mga tuinghaan sa sekondarya sa nasod ang duna nay internet connection.
Sunod niini, gilantaw usab sa DepEd ang kawalay-kuryente sa 9,000 ka mga pampublkong tunghaan sa tibuok nasod. (JPA/ATR/PIA9-Zambo Norte)
