ni Claro A. Lanipa
MANILA, Aug. 25 (PIA) -– Uban sa nagpadayong pagsaka sa mga kaso sa dengue sa nasud, unom ka mga ahensiya sa kagamhanan naghiusa sa puwersa sugod karong adlawa (Agosto 25, 2011) alang sa usa taktikanhon ug hiniusang aksyon batok sa gitawag nga mosquito-borne viral disease nga nakapatay na sa 267 ka mga tawo sa tibuok nasud sa milabay’ng pito ka bulan.
Kining kalamboan migula human ang mga Sekretaryo – Jesse Robredo sa Department of the Interior and Local Government (DILG), Enrique Ona sa Department of Health (DOH), Armin Luistro sa Department of Education (DepEd), Ramon Paje sa Department of Environment and Natural Resources (DENR), Mario Montejo sa Department of Science and Technology (DOST) ug Chairperson Francis Tolentino sa Metro Manila Development Authority (MMDA) mipirma sa memorandum of agreement alang sa gitawag Inter-Agency Cooperation Strategy for Intensifying Anti-Dengue Drive sa Barangay Bagbag, Novaliches, Quezon City.
Matod pa ni Robredo, gikinahanglan gayud ang usa ka inter-agency ug intersectoral partnership aron sa pag-implementar sa usa ka mapadayonon ug halapad nga kampanya sa pagsumpo ug pagpugong sa dengue.
“Ang tanang hingtungdang departamento sa kagamhanan ania karon aron sa pagbarog ug pagpatuman sa mga istratehiya ug kongkretong aksyon sa pagsulbat sa pagkaylap sa dengue,” miingon si Robredo.
Ubos sa MOU, ang DILG moawhag sa tanang hepe ehekutibong lokal aron sa pagpalihok sa ilang Barangay Dengue Brigades nga mopahigayon ug mag-supervise sa kampanya sa pagpanglimpyo sa matag panimalay; mohimo ug ordinansang lokal alang sa estriktong pag-obserbar sa kalimpyo; pag-monitor sa kahimtang sa panglawas sa ilang tagsa-tagsa nga dapit; motabang sa mga rural health workers sa pagsabwag sa mga kasayuran; ug pantanyag sa hinabang alang sa mga posibleng pasyente nga gidala sa mga rural health units o mga ospital.
Ang DOH maoy mo-implementar sa epektibong dengue control measures, ug seguroon ang tanang ospital sa DOH ug mga sakop niini andam sa pag-atiman sa mga kaso sa dengue, samtang ang DepEd magtutok sa ilang kampanya sa mga tulunghaan pinaagi sa pagpahibalo sa mga kasayuran ngadto sa mga tinun-an ug ginikanan ug seguroon ang tukmang sanitasyon ug pagpanglimpyo sa mga palibot sa mga tulunghaan.
Sa pikas nga bahin, ang DENR motabang sa implementasyon sa environmental sanitation, samtang ang DOST mopadayon sa paghimo sa scientific ug technological research and development kon unsaon sa pagpakunhod ang sakit nga dengue. Ang MMDA usab, modasig sa mga mayores sa Metro Manila aron sa pag-organisar sa community clean-up sa ilang mga lugar.
Pagkahuman sa pagpirma sa MOA, ang unom ka mga opisyales miuna sa pagpanglimpyo sa mga barangay aron paghatag ug gibug-aton sa nasudnong kampanya batok sa dengue.
Gikan sa Enero hangtod Agosto 6 ning tuiga, adunay suma total nga 45,333 kaso sa dengue ang natala sa DOH sa tibuok nasud, diin 33.5 porsiento mas ubos kaysa 68,168 ka mga kaso sa susamang panahon sa milabay’ng tuig.
Sa suma total nga 45,333 kaso sa dengue sa tibuok nasud, 34,652 ka mga kaso ang nahitabo sa Luzon, 5,091 sa Bisayas ug 5,590 sa Mindanao. (ALT/CAL/PIA9/Zambo Sur)